Stormgangan.

Á fimmtudaginn var flutti ég ræðu í Samhjálp sem bar yfirskriftina Stormgangan. Vegna tímaskorts gat ég ekki komið á framfæri öllum þeim punktum sem ég vildi. Tilfinning mín var því sú að það sem ég vildi koma á framfæri hefði farið fyrir ofan garð og neðan hjá einhverjum.

Í tilraun til þess að koma því á framfæri sem ég vildi sagt hafa, ákvað ég að nýta mér tæknina, skrifa upp ræðuna og setja hana upp hér á netinu. Hvort einhver nennir eða hefur áhuga á að kanna innihaldið, verður að liggja á milli hluta.

Hugleiðinguna finnur þú undir liðnum pistlar eða ferð beint þangað hér.

Forsætisráðherraskiptin

Yngsta syni mínum varð að orði þegar hann sá frétt í sjónvarpinu þess efnis að nýr forsætisráðherra hefði tekið við af Davíð Oddssyni:

"Ég vil miklu frekar fá nýtt Yougio-spil heldur en nýjan forsætisráðherra."

Ég skal játa að ég hreifst af einfaldleika þessara tíðinda í huga barnsins, í mörgu mættum við hinir fullorðnu taka okkur innihald svarsins til eftirbreytni, þ.e. gera ekki úlfalda úr mýflugu.

En hvernig líst þér á breytingarnar í stjórnarráðinu?

Íslam í íslenskum skólum.

"Frá næsta ári verður skylda að kenna nemendum í íslenskum framhaldsskólum undirstöðuatriði íslams og munu þeir lesa valda texta úr kóraninum."
Mbl. 12. sept. 2004.

Tókstu eftir þessari frétt?
Ertu sátt/ur við fréttina?

Ég verð að játa að ég falsaði þessa frétt örlítið, reyndar ekki mjög, því fréttin er um að danir en ekki íslendingar hafi komið á þessari tilskipun. Ef danir hafa ákveðið þetta, hversu langt verður í að slíkt verði að veruleika á Íslandi !

Hvað finnst þér um samskonar innleiðingu í íslenskum framhaldsskólum?

Skórnir og þakið.

Ég var á frábærri samkomu í Samhjálp í kvöld. Eins og alltaf var lofgjörðin frábær, fólkið frábært, vitnisburðurinn hjá Sigurði Karlssyni frábær og ræðan hans Halldórs Lárussonar frábær. Ég veit bara ekki hvar þetta endar en Guði einum sé lof og heiður.

Mig langar að taka tvennt sem sagt var á samkomunni út.

Annars vegar það sem Sigurður sagði í vitnisburðinum og hins vegar nokkuð sem Halldór sagði en prédikun hans var um kraftinn sem er í orði Guðs og þann mátt sem okkur er gefin með Orðinu, ,,Því að orð Guðs er lifandi og kröftugt og beittara hverju tvíeggjuðu sverði og smýgur inn í innstu fylgsni sálar og anda, liðamóta og mergjar, það dæmir hugsanir og hugrenningar hjartans". Hebreabr. 4.12. Tölum orðið út!

Sigurður dró fram afar skemmtilega samlíkingu á barnatrú og fullorðinstrú. Oft heyrum við þennan frasa, Ég á nú mína barnatrú. Með þessa samlíkingu í huga sagði Sigurður, ,,Ég á nú mína barnaskó" (átti við sjálfan sig í þátíð). Það þarf svo sem ekki að fara mörgum orðum um þetta en við vitum að við sem fullorðnir einstaklingar pössum ekki í barnaskóna okkur, alveg er það eins með trúna okkar, þegar við erum fullorðin þurfum við fullorðinstrú, ekki barnatrú.

Svo var það Halldór og þaklekinn: Hann sagði frá því að ef hans elskulega kona hún Árný, væri svona að finna að einhverju (hann sagði þetta mjög mjúklega), þá hefði hann minnt hana stundum á þaklekann í Orðskviðum Salómons, ,,Konuþras er sífelldur þakleki". Orðskv. 19.13. Þá hefði Árný tekið utan um hann og sagt, ,,Halldór minn hver á að gera við þakið"? Snilldarsvar og okkur körlum öllum áminning um það að við eigum að veita eiginkonum okkar vernd.

Guð blessi þig og gefi þér góðan dag!

Því sem við glötum kemur aldrei aftur.

Ég eins og margir aðrir hef verið sem steini lostinn yfir barnamorðunum í Beslan í Norður-Ossetíu. Þá grimmd, heift og hatur sem þarna liggur að baki er erfitt að gera sér í hugarlund.

Fjöldi foreldra, ættingja og vina syrgja nú sína nánustu eftir grimmdarverk Tsjetsjenskra aðskilnaðarsinna. Ömurlegt hefur verið að sjá myndir örvinglaðra foreldra syrgja börnin og nánast engin leið að setja sig í spor þeirra. Það getur enginn nema sá sem misst hefur.

Mér varð í þessu sambandi hugsað til þess að því sem við glötum kemur aldrei aftur til okkar! Hversu dýrmætt er að hlúa að og elska allar þær góðu gjafir sem Guð hefur gefið okkur, börnin okkar, fjölskyldan okkar, ættingjar og vinir og eða annað sem við metum meira en annað. Hlúum að því sem við eigum, við vitum ekki hversu lengi við höfum það.

Að lokum vil ég minna alla gesti vefsins um að biðja fyrir öllum þeim sem um sárt eiga að binda í Beslan.

Það er eins og gerst hefði í gær.

Ótrúlegt en satt, litla barnið mitt er orðinn 9 ára (er enn meðhöndlaður eins og hann sé 5, eins og gjarnan er með yngsta barnið). Mér finnst eins og það hafi verið í gær sem ég hélt á litla guttanum okkar Sigrúnar á fæðingardeild LSP (læknarnir kölluðu hann Rumurinn, af því að hann var svo stór og þrekinn). Þegar maður tekur börnin sín í fyrsta skipti í fang sér og virðir fyrir sér það fallegasta sem maður hefur séð (fyrir utan mömmuna náttúrulega (pjúh, þar skall hurð nærri hælum)), þá skiptir ekkert annað máli og manni líður eins og maður haldi á öllum heimsins gæðum í fangi sér. Reyndar heldur svo þessi tilfinning áfram að bærast innra með manni og maður á bestu, flottustu og gáfuðustu börn í heimi sem skara framúr á flestum sviðum. (Þetta með að segja á flestum sviðum er náttúrulega bara sýndar-hógværð en eins og allir foreldrar vita, þá skara börnin okkar (hvers um sig) framúr á öllum sviðum).

Elsku Bjarki Enok, til hamingju með daginn !

Illgresi

Mæt og afar góð vinkona mín mun hafa sagt: Ef einhver sáir illgresi í garðinn þinn þá er það þitt hlutverk að reita það úr honum. *1

Ég hef verið að hugsa svolítið um þess setningu (það er í ættinni að þurfa að pæla hlutina út og suður) og verð að segja að ég er setningunni hjartanlega sammála, því þó sumir (sjálfskipaðir og ekki) vilji hjálpa manni til þess þá er ábyrgðin á okkar eigin garði okkar. Enda sjáum við slíkt illgresi oft best sjálf.

Það var samt eitt sem mér datt í hug í þessu sambandi (beint til okkar allra, svo það sé á hreinu). Þegar maður reitir illgresi, þá þarf maður að gæta þess mjög að reita ekki hluta af því góða með. Því hvort sem um er að ræða okkar veraldlega garð eða andlega, þá er illgresiseyðing vandasamt verk, eða eins og sagt hefur verið: Hendum ekki barninu út með baðvatninu.

*1 Heimild: EBB.