Friðrik Hrafn Jónsson

Eins og lesendur síðunnar hafa lesið, sem og allir þeir sem okkur þekkja vita, er að mágur minn Friðrik Hrafn, aðeins 42 ára, fékk alvarlegan blóðtappa við heila fyrir nokkrum vikum.

Friðrik er 4 barna faðir, elstur er Friðrik Viðar 22 ára háskólanemi í Bandaríkjunum, næstur er Ásgeir Óskar 17 ára nemi í fjölbrautarskóla, þá Annie Björt 15 ára nemi í Njarðvíkurskóla og yngstur er Kristján Alex 4 ára.

Um nokkurra ára skeið bjó fjölskyldan í Bandaríkjunum en flutti heim á síðasta ári. Vegna þess er Friðrik ekki kominn í almenna tryggingakerfið, þannig að allur kostnaður af því að bjarga lífi hans fellur á fjölskylduna, eins ósanngjarnt og það kann að hljóma að Íslenskur ríkisborgari þurfi 6 mánaða fasta búsetu hér til að komast inn í kerfið að nýju. Svo alvarlegt var áfallið að það telst kraftaverk að hann skuli enn vera á lífi. Í dag er hann kominn á almenna heila- og taugadeild. Hann er lamaður á hægri hlið, hann getur ekki tjáð sig og óvíst hversu mikla skynjun hann hefur. Hann sýnir þó framfarir á hverjum degi og trúum við því að honum muni fara mikið fram á næstu vikum og mánuðum og ná bærilegri heilsu. Ljóst er þó að ferlið mun verða langt og strangt.

Fjárhagslega er útlitið ekki bjart hjá fjölskyldunni og því hefur verið stofnaður söfnunarreikningur í nafni Friðriks og væri öll hjálp afar vel þegin og minni á að margt smátt gerir eitt stórt.

Söfnunarreikningurinn er nr. Banki 0142 Hb. 05 Reikn. 72820. Kt. 020564-2969.

Trúin, AA og árangur

Undanfarnar vikur hefur mikið verið rætt um meðferðarleiðir og árangur og eru skoðanir skiptar. Í gegnum árin hef ég skoðað þessi mál og m.a. hvernig árangur AA samtakanna var í upphafinu er þeir skilgreindu æðri mátt sem Guð kristinna manna. Það er athyglisvert hversu hár árangur AA samtakanna var í upphafinu í ljósi þess að fyrstu félagarnir höfðu fengið úrskurðinn "læknisfræðilega ólæknandi." Ég setti niður nokkrar hugsanir á blað og flutti þær sem pistil á Lindinni í morgun. Hef sett pistilinn upp hér á síðunni, þú finnur hann undir liðnum Pistlar, eða ferð beint þangað hér.

Von okkar aukist

Nú á sjötta sólarhring frá því að mágur minn, Friðrik H. Jónsson, fékk blóðtappa við heila er allt heldur í áttina þó að læknarnir segi ástand hans hans enn lífshættulegt og enn sem komið er lítil batamerki. Þrýstingur vegna bólgu í heilanum hefur rénað frá því að vera um 18 frá því eftir að hann fór í bráða aðgerð, til að létta á þrýstingnum, niður í að vera 4-11 en 8 er eðlilegur þrýstingur. Fyrir aðgerðina var þrýstingurinn yfir 30 sem er banvænt ástand. Von okkar er að batinn sé að byrja og hann þá kominn yfir það versta, þó enn sé of snemmt að fullyrða neitt um það.

Við erum afar þakklát öllum þeim sem hafa uppörvað með samtölum og kveðjum, sem og öllum þeim sem hafa beðið fyrir bata mágs míns. Sömuleiðis berum við kveðju konunnar hans og barna til allra þeirra sem staðið hafa bænavaktina. Við biðjum ykkur um að biðja áfram og biðja fyrir fullkomnum bata.

Og hvers sem þér biðjið í mínu nafni, það mun ég gjöra, svo að faðirinn vegsamist í syninum. Ef þér biðjið mig einhvers í mínu nafni, mun ég gjöra það.
Jóh. 14:13-14

Skrítnir dagar!

Þeir hafa verið skrítnir undanfarnir dagar. Á mánudagsmorgunn bárust okkur þær fréttir að Friðrik mágur minn, 42 ára, hefði fengið blóðtappa við heila. Í dag liggur hann á milli heims og helju og er ástand hans mjög alvarlegt. Það er ljóst að lifi hann af, þá er málið farið og hægri hliðin er lömuð. Eftir situr fjölskyldan sem lömuð og spyr sig, hvernig getur þetta gerst að þetta hendi svo ungan mann?

Þetta er svona eins og að fá kjaftshögg. Öll þessi hversdagslegu vandamál sem maður er að takast á við dagsdaglega verða agnarsmá samanborið við þann raunveruleika sem blasir við mági mínum. Maður upplifir eins og maður hafi ekki lengur leyfi til að kveinka sér. Þegar líkamleg heilsa er til staðar þá á maður alltaf möguleika á að rétta úr kútnum, sé hún farin skerðast möguleikarnir til mikilla muna. Hættum að væla!

Og aftur að heilsunni. Heilsan er mikið til á okkar ábyrgð og að sjá hversu mikil áhrif þetta áfall hefur á fjölskylduna setur fram þá fullyrðingu, að við getum ekki leyft okkur þá sjálfselsku að hugsa ekki um heilsuna. Þó svo að tilfelli eins og mágs mín sé afar sjalgæft og ekkert sem læknarnir geta sagt til um með neinni vissu, hverjir eru áhrifaþættir þess hvernig fór, þá er ljóst að almennir áhættuþættir eru nokkrir:

Mataræði (kolvetni, hörð fita), hreyfing, reykingar, áfengisdrykkja. Höfum þessa þætti í lagi. Borðum hollan mat, hreyfum okkur, reykjum ekki og drekkum ekki.

Í hönd fer sá sólarhringur sem getur skorið úr um framtíð mágs míns. Ég bið hvern og einn sem að les þessar línur að senda STÓRA bæn til Drottins um líf og bata fyrir Friðrik.