Við fastráðningu leggur vinnuveitandi bifreiðastjórum til einkennisfatnað, það er jakki, tvennar buxur, tvennar skyrtur og bindi árlega, svo og úlpu á þriggja ára fresti, án endurgjalds, þó ekki fyrstu þrjá mánuðina. Þegar einkennisfatnaður er afhentur, skal kvitta fyrir móttöku fatnaðarins.

Bifreiðastjóra er skylt að nota fatnaðinn við vinnu sína.

Jafnframt skal bifreiðastjórum, öðrum en þeim sem að staðaldri stunda akstur innanbæjar, lagður til kuldagalli við fastráðningu. Hlífðarfatnaðurinn er eign vinnuveitenda og skal bifreiðastjóri sjá til þess að hann sé til staðar í bifreiðinni þegar á þarf að halda. Gallinn skal endurnýjaður eftir þörfum en þó eigi sjaldnar en á þriggja ára fresti.

Hafi bifreiðastjóri ekki fengið tilskilinn fatnað, þegar hann hefur unnið þrjá mánuði hjá vinnuveitanda, eða reglulega á 12 mánaða fresti, skal greiða honum mánaðarlega 3.000 kr. frá ráðningardegi þar til hann fær fötin. Greiðsla þessi miðast við vísitöluneysluverðs sem var í júlí 2001 og breytist árlega skv. þeirri vísitölu.

Vinnuveitanda er skylt að greiða fyrir viðgerðir, þrif og hreinsun einkennis- og hlífðarfatnaðar í þeim tilfellum að orðið hafa óhöpp við vinnu (bilanir, slys, olíuóhöpp og fleira).

Fötin eru eign vinnuveitanda og óheimilt er að nota þau nema við störf hjá honum.

Bifreiðastjóra ber að standa skil á notuðum fatnaði.

Verði starfsmaður sannanlega fyrir tjóni á algengum nauðsynlegum fatnaði og munum við vinnu svo sem úrum, gleraugum og svo framvegis skal það bætt samkvæmt mati. Náist ekki samkomulag, skal farið samkvæmt mati eins fulltrúa frá hvorum aðila hlutaðeigandi kjarasamnings.

Slík tjón verða einungis bætt, ef þau verða við vinnu. Eigi skal bæta slíkt tjón, ef það verður sannanlega vegna gáleysis eða hirðuleysis.