Veiðiferð í Hörgá

Það var mildur hlýr og hlýr laugardagurinn 16. ágúst er ég og bróðir minn Rúnar ásamt börnum okkar, Bjarka Enok syni mínum og Jónheiði dóttur Rúnars lögðum leið okkar að Hörgá sem rennur eftir Öxnadalnum skammt vestan Akureyrar. Við áttum 2 stangir á svæði 4b og héldum vongóðir að fyrsta veiðistaðnum sem var Helguhylur, enda sagður besti veiðistaður svæðisins. Ekki höfðum við þó lagst í nægilega mikla rannsóknarvinnu áður en leyfin voru keypt því svæðið hafði ekki gefið mikið af sér í sumar þó svo hafi verið um önnur svæði. Við skiptumst á við börnin okkar og leyfðum þeim að spreyta sig við veiðiskapinn en án þess að nokkur yrði var. Rúnar ákvað að færa sig neðar þar sem áin rann nokkuð djúp á milli kletta en við Bjarki þrjóskuðumst við í Helguhyl. Ég reyndi fyrir mér með flugu og beitti bleikum Nobbler sem gefið hefur vel í ánni en án nokkurs árangurs. Spúnarnir voru teknir upp og nokkrir reyndir án árangurs. Er ég svo beitti 12 gr. Sonettu var kippt í við fyrsta kast og á land kom pattaraleg rúmlega 1 punda bleikja og fyrsti matfiskur sumarsins kominn á grillið...... ég meina á land. Þetta reyndist eina veiði ferðarinnar því þó vatnið væri áfram barið með Sonettunni og fleiri staðir prófaðir, reyndust ekki fleiri fiskar á svæðinu en við bræðurnir komumst að þeirri niðurstöðu að það væri eina skýringin á fiskleysinu.

Er deigi hallaði var það sæll hópur sem hélt heim á leið því að þó veiðin hafi ekki verið mikil er ómetanlegt að eiga samfélag við sýna nánustu þar sem vinátta, væntumþykja og bræðralag ríkir. Heima hjá Rúnari og Júlíönu beið okkar veislumatur og frábært samfélag góðra vina, enda setið og skrafað langt fram á nótt í góðu yfirlæti. Takk fyrir mig!