Góð ferð

Hlíðarvatn er nokkuð stórt vatn (u.þ.b. 4.4 km2) við Selvog í Árnessýslu. Varði einum sólarhring við vatnið í góðum félagsskap þeirra Yngva Rafns Yngvasonar, Friðriks Baldurssonar, Björns Inga Jónssonar og Karlotts Ólafssonar. Veðrið lék við okkur og hið sama gerði fiskurinn sem lék sér að okkur og teymdi okkur erindisleysur víða um bakka vatnsins. Nokkrir fiskar komu þó bæði að landi og á land. Ég hafði eina fimm að landi sem allir komu á fyrir neðan veiðihús Stangveiðifélags Hafnarfjarðar. Tveir þeirra vildu ekki koma uppá land en þrír fóru þá leiðina en var þó hent út í aftur þar sem enginn þessara fimm fiska voru að mínu mati hæfir á grillið vegna smæðar sinnar. Þeir voru allir veiddir á flugu og er það í fyrsta skiptið sem undirritaður veiðir á flugu, þrír á Watson Fancy og tveir á svart mý sem ég kann ekki nafnið á. Ég verð að játa að ef ekki hefði verið fyrir frábæran félagsskap og einstaka náttúrufegurð, hefði ég verið hálf leiður yfir þessum tittum sem vatnið var að gefa og skal játa að ég er ekki spenntur fyrir annarri ferð í Hlíðarvatn. Að veiða 5 fiska er alveg ásættanlegt en að enginn þeirra skuli hæfur á grillið eru vonbrigði. Svipaða sögu var að segja af félögum mínum, Yngvi veiddi þó eina fallega 2.5 punda bleikju í Kaldós, allt annað voru tittir.

Ég er þó sæll og glaður með vel heppnaða og skemmtilega ferð, matfiskurinn kemur seinna og vonandi fyrr en seinna. Já, flugan? Jamm, ekkert síðra en með lifandi beitu!