Nefndarsvið
Alþingis
Reykjavík, 8. maí 2001
Austurstræti
8-10
150 Reykjavík
Landssamtök
hjólreiðamanna (LHM) hafa móttekið bréf frá samgöngunefnd Alþingis,
dags. 26. apríl 2001, þar sem óskað er umsagnar landssamtakanna á tillögu
til þingsályktunar um merkingar hjólreiðabrauta, 485 mál.
LHM fagna
eindregið framkominni tillögu til þingsályktunar um skipan nefndar um hönnun
og merkingar hjólreiðabrauta. Eins og fram kemur í greinargerð með tillögunni
eru hjólreiðar holl hreyfing, áhugaverð keppnisíþrótt, og góð útivist.
Þar að auki eru þær rökréttur samgöngumáti, sem er bæði hagkvæmur og
hljóðlátur og hvorki mengar né krefst mikils rýmis.
Brýn nauðsyn
er á að tekið verði tillit til hjólreiðamanna við hönnun nýrra umferðarmannvirkja
þannig að hjólreiðar verði raunhæfur kostur í samgöngumálum á Íslandi.
Eins og fram kemur í tillögunni eru tengingar milli sveitarfélaga á höfuðborgarsvæðinu
í miklum ólestri. Það skapast ekki síst af því að ákvæði hefur vantað
í vegalög um hver skuli bera ábyrgð á hönnun hjólreiðabrauta. Almennt má
segja að vöntun sé á heildstæðri markmiðssetningu fyrir óvélknúna
umferð að því marki sem nágrannaþjóðir okkar hafa útbúið og bundið
í stöðlum. Er það von LHM að árangur af starfi þessarar nefndar verði
meðal annars endurbætur á stjórnskipulegum ramma fyrir hönnun hjólreiðabrauta.
Í greinargerð
með tillögu til þingsályktunar um skipan nefndar um hönnun og merkingar hjólreiðabrauta
kemur fram að æskilegt væri að í nefndinni sem skipuð yrði væru fulltrúar
félaga hjólreiðamanna. LHM tekur sterklega undir þetta sjónarmið og lýsir
sig reiðubúið til að tilnefna fulltrúa í nefndina um leið og ósk berst
þar að lútandi.
Virðingarfyllst,
f.h.
Landssamtaka hjólreiðamanna,
____________________________
Sigurður M.
Grétarsson