Til: Skipulagsstofnunar
Laugavegi 166,
150 Reykjavík
Reykjavík, 14. júní 2001
Athugasemd Landssamtaka reiðhjólamanna við hönnun
Reykjanesbrautar í gegnum Hafnarfjörð.
Landsamtök reiðhjólamanna gera þá athugasemd
við hönnun Reykjanesbrautar í gegnum Hafnarfjörð að þar er ekki gert ráð
fyrir umferð reiðhjóla meðfram veginum. Öll sú hönnun sem gerir ráð
fyrir reiðhjólum miðast við göngu- og reiðhjólabrýr eða undirgöng þvert
á Reykjanesbrautina en ekki er gert ráð fyrir því að reiðhjólamenn eigi
leið um Reykjanesbrautina sjálfa í gegn um Hafnarfjörð. Það virðist því
aðeins gert ráð fyrir því að menn fari á reiðhjólum á milli hverfa í
Hafnarfirði.
Landssamtök reiðhjólamanna telja umferð á
Reykjanesbrautinni í gegnum Hafnarfjörð vera það mikla að hættulegt geti
talist fyrir reiðhjólamenn að hjóla á götunni sjálfri, sérstaklega eftir
að búið er að breyta ljósastýrðum gatnamótum í mislæg. Það kemur til
með að valda því að umferðarhraði mun aukast mikið á þessum stað,
burtséð frá því hvort löglegur hámarkshraði verður aukinn eða ekki. Því
er nauðsynlegt að aðskilja reiðhjólaumferð og bílaumferð á þessum vegi
með lagningu stofnbrautar fyrir reiðhjólamenn meðfram Reykjanesbrautinni. Það
er engan veginn ásættanlegt að krókóttir innanhverfis göngustígar í
Hafnarfirði verði látnir þjóna hlutverki stofnbrautar fyrir reiðhjólamenn
sem ekkert erindi eiga inn í Hafnarfjörð, heldur eiga aðeins leið þar í
gegn.
Samkvæmt umferðalögum eiga reiðhjólamenn að
vera á akbrautum. Heimild til að hjóla á göngustígum er undanþáguákvæði
í umferðarlögum. Það er því ljóst að ábyrgðin á reiðhjólavegum er
á hendi þeirra sem bera ábyrgð á akbrautum en ekki þeirra sem bera ábyrgð
á göngustígum. Því er ábyrðin á hjólastígum meðfram
Reykjanesbrautinni á hendi Vegagerðarinnar. Reiðhjól eru ökutæki en ekki
leiktæki.
Landsamtök reiðhjólamanna telja það því eðlilega
kröfu að hönnun þeirra umferðarmannvirkja sem hér um ræðir verði breytt
á þann veg að reiðhjólavegi sé bætt þar inn þannig að hægt sé með
öruggu móti að komast á reiðhjóli í gegnum Hafnarfjörð án þess að þurfa
að leggja lykkju á leið sína inn í íbúðarhverfi í Hafnarfirði.
Virðingarfyllst,
Sigurður M. Grétarsson
Formaður Landssamtaka reiðhjólamanna