Reykjavík 12 águst 2001
Ahugasemd við
matsáætlun vegna tvöföldunar Reykjanesbrautar frá Fífuhvammsvegi að Álftanesvegi
Í matsáætlun vegna tvöföldunar Reykjanesbrautar frá Fífuhvammsvegi
að Álftanesvegi er kafli sem fjallar um göngustíga. Þar er talað um
skiptingu í; fjarstíga, aðalstíga, útivistarstíga
og reiðstíga. Þarna er hvergi minnst á hjólreiðastíga þó svo þarna sé
um stofnbraut milli sveitarfélaga á höfuðborgarsvæðunu að ræða. Það
leikur því grunur á að hjólreiðafólki
sé aðeins boðið upp á göngustíg eða akbrautina sjálfa til að fara þarna
um.
Fyrir hönd Landssamtala reiðhjólamanna
vil ég gera athugasemd við þessa útfærslu og árétta þá áherslu
Landsamtaka hjólreiðamanna í samgöngumálum að stofnbrautir hjólreiðamanna
séu aðskildar frá annari umferð s.s gangandi og akandi. Þetta teljum við
nauðsynlegt vegna þess að hraðaviðmið slíkra stofnbrauta þarf að vera að
minnsta kosti 35 km/klst. til að reiðhjól sé raunhæft samgöngutæki á
lengri leiðum. Slíkan hraða er ekki hægt að bjóða gangandi vegfarendum
upp á.
Krafan um hjólastíga, sem ekki
eru ætlaðir gangandi vegfarendum, er ekki krafa um sérstaka stíga fyrir reiðhjólamenn
eina, því við gerum ráð fyrir því að einnig verði heimilt að nota
minnstu gerðir bifhjóla á þeim stígum. Einnig skal bent á að mikil
aukning hefur orðið í fjölbreytni samgöngutækja, sem eru mun umhverfisvænni
en einkabílar auk þess sem þau taka mun minna pláss en þeir. Þar er hægt
að nefna s.s. rafmagnsreiðhjól og vélknúin hlaupahjól. Þessi tæki
teljast til bifhjóla og er því óheimilt að nota þau á göngustígum, á
sama tíma og þau eru talin óæskileg á annasömun umferðagötum eins og
Reykjanesbraut. Þessi umhverfisvænu samgöngutæki verða því hornrekur og
þar af leiðandi óraunhæf sem samgöngutæki ef ekki eru fyrir hendi hjólastígar
þar sem heimilt er að nota þessi farartæki. Krafan um að fá öruggar samgöngur
fyrir vistvæn farartæki á eftir að aukast mikið á næstu árum og áratugum
vegna aukinnar fjölbreytni í framboði slíkra tækja og eins vegna aukins áhuga
á umhverfisvernd.
Af þessum sökum telja Landssamtök
reiðhjólamanna það vera mikla skammsýni að ætla sér ekki að taka slíkt
samgöngunet með í reikningin þegar götur eru tvöfaldaðar og byggðar við
þær mislæg gatnamót. Kostnaðurinn
við það verður mun meiri ef það þarf
að bæta slíkum stíg við eftirá við samgöngumannvirkin.
Fyrir hönd Landsamtaka reiðhjólamanna
Sigurður M. Grétarsson