Hér í umfjölluninni að ofan (um Tunglið) kom fram mikill munur á Jörð og Tungli.  Þessi samanburður Jarðar og annarra hnatta nær lengra því Jörðin hefur talsverða sérstöðu meðal hnatta sólkerfisins.  Sú sérstaða kom vísindamanni nokkrum, James Lovelock að nafni, til að skella fram þeirri kenningu að Jörðin væri lífvera. "Gaia-kenningin", eins og þessi hugmynd var síðar meir kölluð, kom eins og köld vatnsgusa framan í alvarlega þenkjandi vísindamenn áttunda áratugarins, enda var henni vísað á bug sem hugarórum kalkaðs gamalmennis. En kenningin um Jörðina sem lifandi veru, eða lifandi heild, hefur dafnað allar götur síðan og þrifist vel innan um hvers kyns nýaldarkenningar um Móður Jörð.  Skyldi hugmyndin um Móður Jörð (sem finna má í goðsögum þjóða út um allan heim) vera staðfesting á gildi kenningar Lovelocks?  Er um sömu hugsun að ræða?