Athugið!

Það sem hér má finna hefur þegar verið notað til endurskoðunar á nýju korti sem gefið verður út í samgönguvikuni 16.-22. september 2005

Reykjavík og nágrannasveitafélögin ætla að kynna uppfært kort af göngu- og hjólaleiðum á samgönguvikuni 16.-22. september. Vanir hjólreiðamenn sjá að drögin að korti endurspegla ekki veruleikann í dag. Við þurfum ábendingar um leiðir sem eru á kortinu, en eru illfærar, hættulegar eða hreinlega ekki til staðar. Hjólreiðamenn fengu kortið í hendur 29.ágúst 2005

Kortið er stöðugri í endurskoðun. Sendið því allar ábendingar til LHM

Sjá 1. útgáfu kortsins (pdf. 3.18mb)

Athugasemdir sem borist hafa frá hjólreiðafólk við stígakort höfuðborgarsvæðisins

Athugasemdir verða ekki birtar undir fullu nafni. Myndir sem borist hafa verða sýndar síðar

Ég vil gera smá athugasemdir við þetta kort og það er stígurinn sem á að liggja meðfram sæbrautinni, hann er varla til staðar þ.e. frá Holtagörðum og til Laugarness allavega ekki sem hjólreiðastígur það er kannski hægt að ganga þar en það er ekkert hjólafæri og þar að auki vantar algjörlega stíg á köflum á þessu svæði. Það er eins og það hafi verið byrjað á stíg en gleymst að halda áfram með hann bara ákveðið að stoppa hérna fólk er ekkert að þvælast lengra er það nokkuð? Ekkert með það að gera. Dæmalaus vitleysa. Einnig vildi ég minnast á stíginn sem liggur meðfram Kringlumýrarbraut fyrir neðan Suðurlandsbraut hann er í ansi slæmu ásigkomulagi. Og fyrst ég er byrjaður að kvarta þá er ágætt að láta þetta fljóta með, hver hannar eiginlega sum gatnamót hérna í borg!!! Dæmi: ég kem að gatnamótum og er á stíg, fer yfir gatnamótin en þegar ég er kominn yfir þá þarf að fara aftur yfir götu til að geta haldið mig á stíg. Hvers vegna var ekki aðkoman ekki höfð þannig að nóg væri að fara einu sinni yfir götu til að halda sig á stíg? Þessir verkfræðingar hljóta nú að vita að stysta leið milli tveggja punkta er bein lína, en ekki með 90° vinkil beygju í 3ja punkt.

Bestu kveðjur
B.V.

Mér til mikillar undrunar virðist vera merktur hjólastígur meðfram Smiðjuveginum. Í rauninni eru þarna aðeins mjóar gangstéttir og með frekar háum köntum að mig minnir. Þarna er mjög mikil umferð og því mjög erfitt að komast yfir götuna. Ég held að á þessu svæði sé kortið því frekar langt frá raunveruleikanum.

Á. Á.

"Þetta er nú það mesta bull sem ég hef nokkru sinni heyrt"

Þessi setning Mikka refs úr Dýrunum í Hálsaskógi flaug í kollin á mér þegar ég skoðaði þetta nýja leiðakerfi, þetta ágæta fólk sem er að hanna þetta kort gæti allt eins litað allar götur höfuðborgarsvæðisins með einhverjum flottum litum og skírt þá einhverjum flottum nöfnum eins og aðal eða tengistígur.

Ég bara skil ekki hversvegna vel mentað fólk, arkitektar, verkfræðingar og tæknifræðingar sem hefur ferðast eða jafnvel búið erlendis þar sem búið er að fynna upp hjólið (hjólastíga) getur lagt svona vitleysu á borð heima á íslandi og reynt að telja fólki trú um að nú sé bara allt í lagi...fullt af góðum hjóla og gönguleiðum eru til staðar í borginni, þið hafið bara ekki tekið eftir því.
Margt þessum fræðingum bjuggu hérna í Danmörku og notuðu reiðhjól til allra daglegra samgangna þegar lifað var sparlega sem námsmaður, ég bara trúi því ekki að þetta fólk gleymi þessum kafla í lífi sínu um leið að það flytur heim aftur til Íslands.

Þetta kort sem er verið að gefa út er bara peningaeyðsla, mér persónulega líður ekkert betur þegar ég hjóla á mikilli umferðargötu innan um mis vel vakandi bílstjóra þó gatan sé mertk á einhverju korti sem tengileið fyrir hjólreiðafólk því bílstjórarnir vita ekkert af því og í þeirra augum erum við bara að þvælast inn á þeirra leikvelli.

Eftir að hafa hjólað í Danmörku í 2 ár þá kom ég heim til Íslands í sumar, á þessum 2 árum merkti ég ekki neinar lagfæringar á stígum eða nýjar úrlausnir fyrir okkur sem hjólum, það eina sem ég sá en notaði ekki voru þessar nýju göngu og hjólabrýr, sem mig grunar að séu að kosta alltof mikla peninga sem betur mætti nýta til að leggja almennilega hjólastíga.

Hérna í Danmörku er það þannig að fyrst kemur gangstétt, síðan er það hjólastígur og að lokum akbraut fyrir bíla. Þetta er mjög einfalt. Á öllum stærri gatnamótum eða þar sem hjólreiðastígur þarf að skera umferð bíla þá er málað blátt á malbikið sem afmarkar hjólastíginn og er mjög áberandi þannig að bílstjórar vita af því að þeir þurfa að gæta að hjólandi umferð.
Svona er þetta meðfram öllum helstu umferðaræðunum, og að sjálfsögðu beggja megin þannig að hjólandi og akandi eru að ferðast í sömu átt. Ekki eins og ég rakst oft á í sumar í Reykjavík þar sem aðeins var gangbraut öðrumegin götunnar og ef maður notaði hana til hjólreiða þá var maður í raun að hjóla á móti umferð og að koma röngu megin að öllum gatnamótum.

Það er síðan annað mál, og ég veit að hefur margsinnis kvartað yfir því síðustu 15 árin, en það er þetta með stöðvunarlínu og umferðarljós, í Reykjavík höfum við alltaf umferðarljós staðsett bæði við stöðvunarlínu og einnig hinumegin við gatnamótin sem leiðir af sér að ökumenn þurfa ekki að stöðva fyrir aftan stöðvunarlínu til að sjá á umferðarljósin sem síðan leiðir af sér að gangandi og hjólandi komast ekki yfir á gangbrautum nema fara yfir, í gegnum eða framfyrir ökutækið, þetta er óþolandi og ætti að stoppa.

Með kveðju frá DK
J.L

Halló,

Þetta kort er ágætissamantekt á þeim leiðum þar sem hægt er að komast yfir á hjóli, en þó finnst mér það mætti koma betur fram hvers konar stíga er nákvæmlega verið að hjóla á þarna og ekki vera að stunda neinn „blekkingarleik“ í því sambandi, eins og einhver orðaði það. Það mætti t.d. merkja malbikuðu göngu- og hjólreiðastígana í öðrum lit, t.d. fjólubláum (ég er ekki að grínast) og aðgreina þá þannig frá venjulegum gangstéttum sem eru ekki eins greiðfærar og öruggar undir hjólaumferð.

Það er heldur ekki búið að malbika alls staðar, t.d. tenging milli 4 og 8 hjá Smáravelli og leið 4 milli Arnarness og Kópavogs.

Leið 12 frá Bókasafninu í Kópavogi og niður að fjöru í Fossvogi á ALLS EKKERT heima á kortinu: það er ekkert framhald á stígnum þarna, snarbrött innkeyrsla við safnið, ómögulegar gangstéttir, allt of háir kansteinar og jafnvel tröppur (fyrir hjólreiðafólk?!)!!

Leiðin milli 15 og 17, þ.e. frá Nónhæð í Garðabæ yfir hringtorgið og niður blindbrekkuna í átt að Smáralind er líka stórhættuleg.

A.K.

Ég vil þakka fyrir ágætt framtak við að útbúa kort yfir hjóla og göngustíga á höfuðborgarsvæðinu og að hjólreiðarmönnum sé gefið tækifæri á að gera athugasemdir við það. Sem íbúi í vesturbæ Kópavogs langar mig að benda á nokkrar rangfærslur á þessu korti í mínu hverfi og á þeim leiðum sem ég þekki best.

- Merktur er göngu/hjólastígur alla leið fyrir Kársnesið. Rétt er að stígurinn liggur norðan og sunnan megin á nesinu en fyrir nesið, vesturhliðin, liggur ekki stígur heldur dettur maður inná venjulega götu í iðnaðarhverfi. Ekki er auðvelt að finna stíginn aftur fyrir ókunnuga, ef haldið er áfram fyrir nesið.

- Tengistígar sýndir á kortinu í vesturbæ Kópavogs eru t.d. Borgarholtsbraut, sem er bara venjuleg gata með gangstéttum. Samkvæmt þeirri skilgreiningu eru allar götur bæjarins ,,tengistígar".

- Á kortinu er sýnd leið milli Kópavogs og Garðabæjar eftir Hafnarfjarðarvegi, uppá Arnarneshæð. Sé sú leið farin á hjóli eða gangandi þarf að fara á illa farinni vegöxl sem er mjó. Hraðbrautin er á aðra hönd og vegrið á hina. Þetta er stórhættuleg leið og það er mikill ábyrgðarhluti af skipulagsyfirvöldum að beina gangandi og hjólandi vegfarendum þessa leið með útgáfu kortsins.

- Aðrar leiðir sem sýndar eru milli bæjarfélaganna má fara ef maður þræðir sig í gegnum íbúðahverfi beggja vegna bæjarmarkanna. Það er einkum á færi kunnugra að átta sig á hvernig það er hægt því þetta eru hverfi með botnlöngum og sveigðum götum svo auðvelt er að lenda í öngstræti. Auk þess eru gangstéttir víða ófrágengar og illfærar hjólandi umferð. Það er illskiljanlegt hvernig er hægt að rökstyðja að merkja megi þessar leiðir sem sérstaka göngu- og hjólastíga.

- Rétt er að Það liggja engar hjólaleiðir eða göngustígar milli Kópavogs og Garðabæjar. Það er erfitt að komast á milli bæjarfélaganna á annan hátt en akandi.

- Stígar sem merktir eru sem malarstígar eru gjarnan ófærir hjólandi umferð, t.d. er ekki hægt að hjóla eftir Sæbraut endilangri og erfitt er að ganga hana.

- Stígar meðfram Kringlumýrarbraut eru venjulegar gangstéttar og á sama hátt mætti merkja allar götur bæjarins sem göngu og hjólastíga. Þannig vill til á Kringlumýrarbraut að þar er talsverð umferð gangandi vegna nálægðar við skóla og verslunarmiðstöð. Sambúð gangandi og hjólandi gengur ekki vel á þessari leið. Eins er engin gangstétt vestan megin Kringlumýrarbrautar að hluta svo þeir sem ferðast þeim megin til norðurs þurfa að fara tvisvar aukalega yfir ljós til að komast alla leið niður að Sæbraut eða Borgatúni.

Í fljótu bragði virðist felstar leiðirnar sem merktar eru á þetta kort vera venjulegar götur sem ekki hafa verið sérstaklega gerðar aðgengilegar hjóla og göngufólki. Forsendur fyrir vali leiða virðast helst vera að þetta eru fjölfarnar ökuleiðir og segja má að kortið sé ágætis tillaga að því hvar leggja ber sérstaka hjólastíga.

Kveðja,

B.S.

Ég var að kíkja á kortið af stígakerfinu í Kópavoginum. Það virðist vera merkt sem aðalleið (með gulu) leiðin um Birkigrund og Bröttubrekku í Kópvoginum. Ég hef oft hjólað þessa leið og þarf ég að hjóla á götunni nánast allan tímann. Meðal annars er merkt með gulu yfir þar sem eru brattar tröppur á mótum Laufbrekku og Hjallabrekku. Nýbýlavegurinn er sér kafli út af fyrir sig. Hann er merktur með grænum lit á þessu korti. Ef ég hjóla eftir þessari leið að sunnanverðu til austurs þarf ég að hjóla eftir bílastæðum fyrirtækjanna við Nýbýlaveginn og síðar eftir húsagótu við veginn. Sú leið er mjög kræklótt og yfir kanta að fara. Ef ég hjóla eftir þessari leið að sunnanverðu er að ég held enginn stígur fyrir ofan Lund. Þar austar tekur við stígur en hann mjókkar mjög mikið á kafla og er ófær á reiðhjóli við Álfabrekku. Ef ég ætla að fara eftir Nýbýlaveginum upp í Breiðholt þarf ég að fara í grgnum bílastæðin við Engihjallann til að komast á stíg sem liggur yfir í Breiðholtið.

Á. Á.
 

Sæl Björg

Eitt sinn þegar ........ söguskýring tekin út af vefnum.

Þetta er sögubrot sem kom upp í huga minn þegar ég skoðaði þetta “Göngu- og hjólastígakort”. Það eina góða við þetta er að það virðist vera komið fólk í vinnu til að leggja þéttriðið net eins konar samgönguæða um höfuðborgarsvæðið og aldrei þessu vant, EKKI akbrauta. Líklega til að uppfylla plagg sem kallað er “Aðalskipulag”. Þó vantar mikilvægustu stíga eins og meðfram Reykjanesbraut og Vesturlandsveg. Á öðrum stöðum liggja þeir vitlaust þó búið sé að kasta miklu fé í göngubrýr. Sem dæmi við byggingu mislægra gatnamóta við Stekkjarbakka. Þar voru lagðir stígar seint og um síðir í gegn um það landsvæði sem þessi gatnamót hafa eyðilagt sem byggingarland. En borgin bar ekki gæfu til að líta á stígana sem samgöngustíga heldur sem útivistarstíga. Þess vegna liggja þeir á röngum stöðum miðað við það sem eðlilegt gæti talist samgöngulega séð. Og ekki nóg með það, útivistarstígurinn tengist göngubrú yfir Reykjanesbraut sem endar í malarbing á landamærum Kópavogs og Reykjavíkur. Fyrir alla þá sem leggja leið sína milli Fossvogs og Breiðholts væri best að fara um Blesugróf eða sem best væri, eftir óbyggðum stígum beint út Fossvogsdalinn í framhaldi af þessari brú. En það gerir að sjálfsögðu enginn í dag þar sem leiðin er lokuð á fyrrnefndum landamærum og stjórnvöld sveitarfélaganna ræðast ekki við þegar kemur að “lágkúrulegum” göngustígum. Svona má endalaust finna dæmi um stíga á röngu stað og í engu samræmi við legu landsins, notagildi eða til skynsamlegra samgangna.

Ef í alvöru á að kalla þetta kort “hjólreiðastígakort” ætti að merka inn blindhorn og aðra varasama staði. Þeir eru hins vegar svo margir að kortið myndi ónýtast ef það yrði gert. Ég legg því til að kortið heiti ekki “Göngu og hjólreiðastígar” heldur “Göngu og útivistarstígar”. Það er hræsni að kalla það því nafni sem það ber nú.

Það er annað sem er ákaflega pirrandi. Hér virðist vera búið að taka upp merkingu Danska hjólreiðabrautakerfisins sem Danir nota um alla Danmörku en hér er búið að klína því á höfuðborgarsvæðið. En þar er ekki að finna svo mikið sem 10cm hjólreiðabraut! Borgin hefur aldrei, og þess síður hin sveitarfélöginn lagt sig í líma við að auka öryggi hjólreiðamanna á göngustígum. Það breyttist ekkert í vinnu sveitarfélagana eftir að hjólreiðar voru leyfðar illu heilli á gangstéttum 1981. Sveitarfélögin hafa engan áhuga á því að hlusta á rök hjólreiðafélagana um úrbætur. Það sannar t.d. vinna Landssamtaka hjólreiðanna. Það sannar líka þetta kort því líklega er búið að vinna í því á annað ár án þess að hafa samráð við hjólreiðafélögin og án þess að bæta slæma staði til að gera þó kortið notadrýgra. Það er alveg dæmigert að hjólreiðafélögin fá að koma að gerð kortsins nokkrum klukkutímum fyrir útgáfu þess og líklega án þess að tekið sé tillit til athugasemdanna sem berast.

Það er líka alveg dæmigert eftir allt áhugaleysi og aðgerðarleysi stjórnvalda í uppbyggingu vistvænna samgangna þá er það eina sem kemur frá þeim þessi draumsýn á blaði. Og það er ekki einu sinni fullkomið því hagsmunaaðilar og raunverulegir notendur hafa aldrei fengið að koma að vinnu þessa málaflokks svo það hafi haft áhrif. Það verður hræðilegt ef pólitíkusar ætla að nota kortið sér til framdráttar til að sýna fram á að allt sé í fínu lagi á höfuðborgarsvæðinu.

Ég mæli með því að prentun þessa korts verði stöðvuð, annað er peningasóun. Það þarf að setja fé í úrbætur á stígakerfinu þó ekki væri annað en til að auka öryggi. Það þarf að senda bæði pólitíska fulltrúa og íslenska verkfræðinga saman á námskeið um vistvænar samgöngur, ekki síst borgarsamgöngur

En ef prentun á þessu fáránlega korti verður ekki stöðvuð þá mæli ég með því að allt sem tengist hjólreiðum verði tekið út af því. Og kortið heiti “Göngu og útivistarstígakort”.

Kær kveðja

M.B.

Sæl Björg

Takk fyrir að láta okkur fá tækifæri til þess að gera athugasemdir við kortið.
Við munum ræða það í kvöld kl. 20 í húsakynnum Íslenski Fjallahjólaklúbbsins, að Brekkustig 2. Í þessu sambandi hef ég tvo punkta:

- Til þess að gera rýnið skilvirkt hefði verið gott að vera með stóra útprentun
af kortinu.
- Ef einhver frá Reykjavíkurborg vill mæta er það meira en velkomið.

Þetta er stuttur fyrirvari varðandi útprentun á korti, þannig að ég skil allveg
ef það se ekki hægt.

Svona halfpartin í tengsl við þetta kort datt mér í hug að spyrja hvort einhver hjá borginni eða annarsstaðar á opinberum vettvangi á Íslandi gæti hugsað sér að fara á námskeið í hönnun fyrir hjólreiðar í Óslo eftir tvær vikur.
Námskeiðið sjálft er ókeypis og fólk frá Íslandi er velkomið að mæta.
Námskeiðið er á norsku og er lýst hér :

http://www.sykkelby.no/Nyheter/839

Bestu kveðjur

M.L.

Sælt veri fólkið

Ég hef verið að böglast við að hjóla um höfuðborgarsvæðið síðustu 15 árin og verður að segjast að hjólaumhverfið hefur lagast heilmikið á þessum árum og þá sérstaklega í Reykjavík.  En þegar maður ætlar á milli bæjarfélaga þá eru skilyrði til þess alveg hræðileg og hreinlega hættulegt að ferðast hér á milli, nema að fara ógurlegar krókaleiðir í gegnum íbúðahverfi, sem gerir það að verkum að maður hjólar mun minna en annars.  Það vantar alveg að búa til hjóla-/göngustíga á milli bæja.  Maður hugsar stundum til alvöru hjólaborga eins og Köben, en þar eru merktar hjólaleiðir á milli gangstétta og akvega.  Það væri vel hægt að gera þetta hér í Reykjavík.  Ég ætla ekki að koma með neinar töfralausnir hér, en margar lausnir koma upp í kollinum bara við að skrifa þetta.

Við fyrstu sýn virðist kortið vera mjög gott, en við nánari athugun er svo ekki.  Kortið sýnir frekar hvar hjólastígar ættu að vera, en ekki hvar þeir eru.  Finnst mér alveg ótækt að gefa út kort með leiðum sem eru ekki ennþá til og bíða með að gefa út kortið þangað til að búið er að búa til hjólastígana sem merktir eru inn á það.  Eða að taka út af kortinu þær merkingar sem eru út í bláinn (en þá verður vissulega lítið eftir, en þó eitthvað og kortið væri þá líka nothæft).

Með von um bætta hjólamenningu
H. S.
 

Ég tók eftir því að það er kominn þessi fíni malbikaði göngustígur sem nær að Álverinu í straumsvík (Norðurenda). Hann er ekki á kortinu.

Einnig vildi ég skammast yfir hindrunum á göngustígum í Norðurmýri. Það er illmögulegt að komast með hjólakerrru inn á göngustíginn á Snorrabraut. Þverslár sem þar eru er allt of stórar og of nærri hvor annarri :-)
 

Með bestu kveðju,

Á. Ó.

Sæl

Sé ekki möguleika fyrir mig að hjóla frá heimili mínu á Kjalarnesi til borgarinnar.

Kv
Þ.M.

Komið þið sæl.

Mér ofbýður hvernig forráðamenn gorta af því að styðja hjólreiðar en koma í veg fyrir þær með gerðum sínum.

Mig langar því að bjóða fram krafta í þágu hjólreiða. Ég heiti K. H., síminn er 000000 Ég sá um að skipuleggja "hjólað í vinnuna" átakið hjá Háskólanum í Reykjavík í sumar. Þá sá ég greinilega að það sem stoppar flesta af í hjólreiðum er ekki veðrið heldur ástand hjólaleiða í borginni.

Varðandi þetta kort af hjólastígum þá er erfitt að sjá hvar er best að byrja, þetta er hálfgerður skáldskapur allt saman. Ég vil samt reyna að nefna nokkur atriði:

1) Skv. kortinu er hægt að hjóla í Reykjavík frá vesturbæ til austurbæjar, rétt eins og nýja Hringbrautin hafi verið kláruð, nokkuð sem er alls ekki raunin. Þetta verður kannski hægt næsta sumar en er ekki staðan í dag. Það er vafasamur siður að eigna sér verkin fyrr en þau eru unnin.

2) Gangstéttir eru sýndar sem hjólastígar. Það er enginn hjólastígur meðfram hringbraut frá JL húsinu að Þjóðminjasafninu mér vitanlega, aðeins gangstétt. Þessi villa er um allt kortið. Ég tel að gangstéttir eigi ekki að birta sérstaklega á kortinu, þær eru illfærar hjólandi, oft með umferðarskiltum í miðri "brautinni" og mishæðum sem jeppar létu varla bjóða sér.

3) Hjólastígur meðfram sæbraut endar í dag hjá húsi Hrafns Gunnlaugssonar. Frá húsinu og áfram til austurs er hvorki stígur né gangstétt, aðeins hraðbraut. Þar er samt sýndur hjólastígur, að vísu með púnktum. Ég sé engin merki um að þar sé að verða til hjólastígur.

Í gær stóð í Morgunblaðinu að til stæði að klára frágang á gönguleið við Snorrabraut 9.sept. Ég les milli línanna að allt kapp sé þar lagt á að opna fyrir bílaumferð á Snorrabraut, síðan verði hjólastígarnir ekki kláraðir í vetur. Ég hef ekki séð neina vinnu við stígana meðfram Hringbrautinni sl. vikur. Nú er rétti tíminn til að láta heyra hátt í okkur !

Kveðja, K. H.

Sæl.

Það vantar inn á kortið malarborinn reið-, göngu- og hjólreiðastíg sem liggur frá enda Reykjavegar (Ásgarði) í Mosfellsbæ (svokölluð Garðarsbraut sem var einkaframtak), þvert yfir að útfalli Úlfarsár við Hafravatn, áfram yfir heiðina milli Langavatns og Reynisvatns allt að hesthúsahverfinu Fjárborg við Suðurlandsveg þar sem þessi stígur tengist svo áfram inn á þær leiðir sem eru við Rauðhóla og Heiðmörk.

Kveðja.

S.H.

Sæl B.

Mig langar til að koma fram með eina athugasemd við hjóla og göngukort höfuðborgarsvæðisins:

Stígur 4 sem liggur milli Kópavogs og Arnarness í Garðabæ þar er enginn stígur alveg frá síðasta húsi í Arnarnesi og yfir brúnna að undirgöngum Kópavogsmegin ca.200-300 metrar.

Þegar maður fer yfir brúnna er maður alveg út í umferðinni ca.1-2 m frá umferðinni og er þar mjög illfært(óslétt) og síðan er bara mói með þúfum og grjóti þar til að maður kemur inná Súlunes í Arnarnesinu.

Ég hjóla milli Hafnarfjarðar og Reykjavíkur alla virka daga og þetta er verulegur flöskuháls á þeirri leið.

Að öðru leiti sýnist mér sú leið sem ég hjóla vera í lagi.

P.Á

Sæl

Ég er hjólreiðamaður og var bent á hjólreiða- og göngustígakort sem þið eruð að gera.

Ég hjóla oft á milli heimilis og vinnu úr Fossvogi til Hafnarfjarðar. Það kemur mér veruleg á óvart að sjá að óslitinn hjólreiðastígut liggur á milli Kópavogs og Hafnarfjarðar skv. kortinu. Í raunveruleikanum vantar þó sérstaklega stíg frá Kópvagstúninu (hælinu) og yfir hjá botni Kópavogs og inn á Arnarnes. Þar er nú á kortinu merktur stígur sem ég hef ekki orðið var við. Ananrs er ótækt að beina hjólreiðamönnum inn á ýmsar krókaleiðir í stað þess að leggja stíga stystu leiðir meðfram umferðaæðunum. Með litlum tilkostnaði mætti t.d. leggja bundið slitlag út á axlir Hafnarfjarðarvegs sem myndi auka öryggi hjóreiðamanna til muna. Þesar axlir eru nú holóttar og hættulegar og þurfum við hjólreiðamenn því að hjóla á malbikinu, þétt upp við bílaumferðina.

Vona að ykkur gangi svo vel með kortið og sýnið raunverulega stöðu mála á því en ef þetta er framtíðarkort fagna ég að stígur eigi loks að koma á milli Kópavogs og Hafnarfjarðar.

Kveðja
S.E.

Á stíg no.2 er kaflinn framhjá Laugarnestanganum merktur sem malarstígur, það er ekki rétt, þar er enginn stígur og maður hjólar í kanti Sæbrautarinnar á móti umferðinni til að komast fyrir tangann, stórhættulegur kafli sem ég hef oft furðað mig á því trukkarnir eru ansi ógnandi þegar maður mætir þeim.

kv.S

Sæl öll

Þetta er algerlega nausynlegt framtak.

Tengingin úr Garðabæ yfir í Kópavog hefur verið sérstakt áhugamál hjá mér.
Samkvæmt kortinu er sem þarna sé beinn og breiður stígur en þeir sem hafa hjólað þessa leið vita betur.

Kortið sýnir tengingu úr Súlunesi á Arnarnesi yfir á Hafnafjarðarveg og svo um undirgöng til vesturs norðan Kópavogslækjar. Þarna er í raun engin stígur og engin tenging þ.e. frá Súlunesi yfir í Kópavog. Því legg ég til að gula línan (aðalvegur/main path) verði feld út á þessum kafla.

Kveðja, V.S.,
sjúkraþjálfari, Gáska-sjúkraþjálfun

Hjólreiða stígurinn sem merktur er sem aðalstígur og á að tengja vogahverfi (gengur út frá langholtsvegi) og miklubraut er lokaður og er búinn að vera það í marga mánuði vegna framkvæmda. Ég kíkti þar framhjá í dag og virðist hann ekkert vera að opnast í bráð. Var brotinn upp og er ekki til staðar í dag.

Stígurinn sem merktur er sem tengistígur á milli hringbrautar/snorrabrautar og hótel Loftleiðasvæðisins er ekki fær hjólreiðafólki eins og er vegna framkvæmda og hefur mér fundist mjög erfitt að sjá hvernig ég á að hjóla þarna í gegn í framtíðinni á leið frá Borgarspítala að Landspítala.

Stígurinn sem tengir Elliðárdal við fossvogsdal er að hluta til malarstígur. Og Stígurinn sem tengir Geirsnef við göngin undir sæbrautina í Elliðárdalnum er malarstígur og ekki greiðfær, það eru tröppur á honum og brött renna þar við hliðina á sem ég hef ekki lagt í að hjóla niður.

Brúin yfir elliðárnar (stíflan) er með tröppum á og örmjóum rennum fyrir hjólin. Erfitt að fara þar yfir á hjóli sérstaklega á veturna.


Með kveðju D.H.

Þið voruð að biðja um ábendingar um stígakort sem þið ætlið að gefa út. Mig langar til að benda á nokkur atriði.

1. Það er ekki kominn neinn stígur á milli Arnarnes og Kópavogs. Það er alvarlegt að gefa í skin að hann sé kominn þannig að fólk leggi sig ekki í hættu við að fara þessa leið.

2. Hornið á Fífuhvammsvegi og Arnarnesvegi er alveg ófrágengið og núna er verið að moka allt í sundur þannig að það er ekki víst hvenær og hvort að þessi gatnamót komist í almennilegt horf. Þarna eru 3. aðilar sem þurfa að vinna saman með frágang, Kópavogsbær, Garðabær og Vegagerðin.

3. Þar sem stígur nr. 8 kemur úr Garðabæ að Fjarðarhrauni er ekki tenging og langt er í næsta stíg þannig að það þarf að hjóla eftir götunni niður að Hafnarfjarðarvegi eða upp að Fjarðakaupum. Þessi ótenging er búin að vera svona í allavega 5. ár þannig að það þarf að merkja þennan stíg að hann sé varasamur því að hann endar í ekki neinu.

4. Það er verið að vinna við stíg sem byrjar við endann á Álfheimum og liggur í gegnum Skeifuna og endar við göngubrúna sem er við Hagkaup og liggur yfir Miklubraut. Það gæti verið ágætis stígur ef það væri ekki svo mikið klúður með tenginguna upp á brúna. Það eru gerðar tröppur þar upp í staðin fyrir að hafa halla uppá göngustíginn sem liggur meðfram Miklubraut og þá væri hægt að fara upp á brúna þar.

5. Það er fínn frágangur á stígnum sem liggur meðfram Miklubraut við Faxafen 8-10. Það er góður rampur þar niður að bílaplaninu en svo er oft ekki hægt að notfæra sér þann stað því að það er alltaf lagt bílum við enda rampsins þannig að það er stórvarsamt að komast þar niður. Lausnin væri að blokkera eitt bílastæðið þannig að betra væri að komast niður.

6. Sama á við gangbraut yfir Suðurlandsbraut við Reykjaveg. Þegar að farið er yfir Suðurlandsbrautina í áttina að Fálkahúsinu er ekki hægt að nálgast húsið því að það eru lagðir bílar við gangbrautina þannig að ekki er hægt að komast af henni. Þarna vantar upphækkun þannig að hægt sé að komast að húsunum án þess að bílum sé lagt fyrir.

7. Það er ekki merktur stígur sem liggur á milli blokkanna í Álfheimum og Laugardalsins. Hann byrjar við Gnoðarvoginn næst Glæsibæ og endar við Langholtsskóla.

8. Það er ekki merktur stígur sem liggur frá Álfheimum niður í gegnum Efstasund, Skipasund og endar á stíg nr.2. Þessi stígur hét einhven tíman Brákarsund.

K. H.

Góðan daginn

G.E. heiti ég, meðlimur í ÍFHK og langhlaupari, og telst því líklega stórnotandi á stígakerfi höfuðborgarinnar.

Mig langar að gera tvær athugasemdir við fyrirhugað kort af höfuðborgarsvæðinu.
Ég mundi eflaust geta gert fleiri ef ég mundi liggjast yfir þetta lengur, en þetta eru þær mikilvægustu held ég.

Í fyrsta lagi, þá finnst mér mjög slæmt að enginn greinarmunur er gerður á sérstökum göngu/hljólastígum annars vegar, og gangstéttum meðfram götum hins vegar.
Þetta er algert grundvallaratriði, t.d. þegar er farið út að hlaupa, þá vill maður miklu frekar halda sig á sérstaklega afmörkuðum stígum. Eins er þetta mikilvægt fyrir þá sem eru með kerru aftan í hjólinu (eins og ég geri nokkuð oft), gangstéttir eru mjög leiðinlegar í því samhengi. Með því að koma þessum mun skýrt á framfæri, mundi nýtileiki þessa korts stóraukast að mínu mati.

Hin athugasemdin er við að skuli vera merktur inn malarstígur frá Holtagörðum að Kirkjusandi meðfram Sæbraut. Ég veit ekki alveg um hvaða stíg/leið er þarna að ræða.
Persónulega tel ég fráleitt að gefa í skyn að þarna sé leið sem sé hentug fyrir gangandi svo sé ekki talað um hjólandi vegfarendur. Ef ég er að hjóla/hlaupa á milli þessara tveggja punkta þá fer ég mun frekar um a) Laugardalinn eða b) um iðnaðarhverfið fyrir neðan Sæbrautina. Eina undantekningin á því er í Reykjavíkurmaraþoni þegar Sæbrautinni er lokað fyrir bílaumferð...

Með von um að athugasemdir þessar verði teknar til greina.

Kveðja

G. S. E.

Góðan daginn
Ég er "innikróaður" Garðbæingur sem finnst gaman að hjóla !

Hér eru mínar athugasemdir við kortið:

1.
Tengistígur milli leiðar 15 og 17 er illfær þar sem að engin gangbraut né undirgöng eru við hringtorgið uppi á Nónhæðinni og vantar uppá stíga meðfram götunni niður að Smáralindinni. Ég fer þessa leið daglega til og frá vinnu og þarna eru gangandi og hjólandi vegfarendur æfinlega í einhverju "limbói út á götu" ef svo má að orði komast.

2.
Stígur 8 milli Kópavogs og Garðabæjar tengist bara alls ekki. Ef komið er frá Garðabæ þá kemur maður af stíg og svo yfir veginn (mikil umferð) á gangbraut eftir gangbrautina er "ekkert", bara malarkanturinn á veginum. Síðan tekur við fínn stígur Kópavogsmeginn. Þarna eru reyndar einhverjar framkvæmdir í dag og gæti verið að taka á þessu í leiðinni.

3.
Stígur 4 milli Kópavogs og Garðabæjar er illfær. Þegar maður er kominn í gegnum Arnarneshverfið þá tekur við kafli sem er bara gatan með þeim gríðarlega umferðarþunga sem þar er.

4.
Þá vantar algjörlega tengingu milli Garðabæjar og Linda og Salahverfisins. Þar sem leið 16 og 17 mætast eru undirgöng undir Reykjanesbraut og austan Reykjanesbrautarinnar frá þessum undirgöngum og að hesthúsahverfinu er stígur, en hann endar líka bara þar.


Eftir að hafa hjólað í hálfann mánuð í sumar vítt og breytt um Holland með alla fjölskylduna (tvenn hjón með 5 börn) þá veigrar maður sér við þessum leiðum sem eru víða í boði hér. Að minnsta kosti eru fár leiðir hér um bæinn og þá sérstaklega á milli bæja sem maður myndi treysta börnunum einum. Þessar leiðir í kringum mig liggja allar yfir eða um miklar umferðagötur.

Takk fyrir að fá möguleika á að koma með athugasemdir við kortið.
með vinsemd.

SG