Sælt veri fólkið
Það er varla hægt að draga öllu lengur að senda ykkur rök Landssamtaka
hjólreiðamanna fyrir því að hafa samhliða hjólreiðabraut norðan Laugavegar
fremur en aðgreindar í vegstæði. Það að gera vefsíðu um hjólreiðabrautir
tekur mun meiri tíma en áætlað var. Því sendi ég ykkur rökin hér í
viðhengi í Word skjali. Upptalningin á kostum og göllum er ekki tæmandi en
ætti að gefa einhverja hugmynd um hvað við Landssamtaka menn erum að
hugsa.
Okkur þætti vænt um að fá fylgjast áfram með þessari vinnu.
Ég læt ykkur vita þegar vefsíðan er komin af stað.
Kær kveðja
Magnús Bergsson
http://hjol.org
---------------------------------
Viðhengið í Word skjali -----------------------------------
Formáli:
Það er mikilvægt að hjólreiðabrautirnar verði frá
upphafi vinsælar hjá almenningi og ekki verði gerð skipulags- eða
hönnunarmistök við gerð þeirra. Hjólreiðabrautirnar eiga ekki að vera
hannaðar aðeins fyrir hörðustu hjólreiðamenn. Það er mikilvægt að sem
flestir finni til meira öryggis á hjólreiðabrautum en á akbrautum.
Íslenskt foreldri sem telur barni sínu best borgið í fjölskyldubílnum
verður að fá það á tilfinninguna að það sé öruggt að senda barn sitt í
skólann á hjóli. Það er einnig mikilvægt að hjólreiðabrautir verði
sýnilegar á stöðum þar sem notkun bíla gæti talist óþörf eins og innan 30
km hverfa. Það gerist best með því að koma hjólreiðabrautum fyrir í
vegstæði. Rauðar hjólreiðabrautir innan 30 km hverfa gætu því haft betri
áhrif á ökumenn en hraðahindranir. Til þess að fólk noti hjólreiðabrautir
og þær skili sem mestum „arði“ þurfa þær að vera sýnilegur samgöngukostur.
Þær þurfa að vera öruggar og ekki síst greiðfærar.
Við mælum með því að hjólareinar verði hafðar í
vegstæði frá Hlemmi að Höfðatúni en gert er ráð fyrir að þar verði „róleg“
gata.
Kostir samhliða hjólreiðabrauta norðan Laugavegar:
- Það þarf ekki að hliðra til akbrautinni til
norðurs. Minna umstang, minni kostnaður.
- Mikið rými norðanmegin, en lítið sunnanmegin. Á
það ekki síst við um framhaldið meðfram Suðurlandsbraut.
- Margar innkeyrslur sunnanmegin, m.a. að bílasölum
og bensínstöð. Enga innkeyrslur norðanmegin
- Færri tæknileg vandamál í samspili hjólandi og
akandi umferðar þar sem bílaumferð er mjög hröð.
- Gefur möguleika á því að grafa göng undir
akbrautir til að greiða leið hjólandi s.s. undir Nóatún, Hátún og
Reykjaveg (jafnvel brú yfir Kringlumýrarbraut).
- Gott framhald til austurs meðfram Suðurlandsbraut
og í raun gott rými fyrir samhliða hjólreiðabraut alla leið að Mörkinni.
- Fjarlægð frá bílaumferð gerir hjólreiðar
ánægjulegri. Hjólreiðafólk finnur til meira öryggis sem mun auka
hjólreiðar.
- Hjólreiðamenn fá umferðarmerkingar til samræmis
við akbrautir sem gefur gott uppeldislegt gildi.
- Hlykkir og beygjur verða aflagðar þar sem
hjólreiðabrautir þvera akbrautir. Kallar því á löngu tímabæra breytingu
á hönnun.
- Ljós sett á hægri beygju akbrautar við gatnamót.
Götuviti handan gatnamóta verði aflagður. Götuvitar verði aðeins
staðsettir við stöðvunarlínu. (Mikilvægt fyrir jafnræðisregluna).
Gallar:
- Við gatnamót þar sem ekki verða umferðaljós þarf
að vara bílstjóra sérstaklega við hjólandi umferð úr báðum áttum. Fram
til þessa hafa þeir ekki þurft að gefa gangandi eða hjólandi vegfarendum
gaum, jafnvel þótt þeir séu að breyta um akstursstefnu.
- Ekki hægt að taka vinstri beygju yfir gatnamót. Í
þeim tilfellum tekur það lengri tíma fyrir hjólreiðamenn að fara yfir
gatnamót en ökumenn.
- Menn verða að hanna gatnamót til samræmis við það
sem finna má í nágrannalöndum okkar (jafnræðisreglan). Það gæti pirrað
einstaka ökumenn sem fram til þessa hafa ekki þurft að taka tillit til
annarrar umferðar en bíla.
Kostir hjólareina í götustæði:
- Hjólreiðafólk verður sýnilegt í umferðinni.
- Hjólareinar eru sýnilegar og minna því ökumenn
stöðugt á aðra samgöngukosti.
- Hvetur ökumenn til að hjóla, ekki síst ef tafir
verða á bílaumferð.
- Flestir reyndir (hraðskreiðir) hjólreiðamenn telja
þessa gerð hjólreiðabrauta besta kostinn.
- Bæði ökumenn og hjólreiðamenn verða að umgangast
hvora aðra með virðingu. Kallar um umfjöllun í fjölmiðlum.
- Hjólreiðamenn taka þátt í sömu umferð og reglum og
ökumenn.
- Kalla ekki á stórvægar breytingar á umferðarlögum
eða almennt á hönnun umferðarmannvirkja.
- Hentar í flest götustæði þar sem bílaumferð er
ekki tiltakanlega hröð.
- Henta mjög vel sem hraðahindrun í 30 km hverfum
(þrengir götumyndina).
Gallar:
- Saltaustur og nagladekk bifreiða mynda vatnsrásir
í hjólförunum akbrauta. Vegna hraða, stærðar og grófra dekkja bifreiða
berst mikill úði frá bílum á blautum dögum. Sá tjörumettaði úði
eyðileggur flest föt á skömmum tíma. Það útilokar þá sem vilja vera
snytilegir til fara og ferðast daglega á hjóli allt árið um kring.
- Meiri svifryksmengun í götustæði en utan. (Er
mikið vandamál)
- Malbikssalli í bland við tjöru og salt safnast
fyrir í vegkantinum og í raun allt að 10 metra út frá stórum
akbrautum. Sallinn eyðileggur reiðhjól, sérstaklega drifbúnað, á mjög
skömmum tíma. Skófatnaður eyðileggst, jafvnel þótt menn séu með
aurbretti á hjóli.
- Margir íslenskir foreldrar hvetja ekki börn sín í
dag til að hjóla vegna ótta um slys. Það er afar ólíklegt að það
breyttist til batnaðar ef hjólreiðabrautir yrðu samhliða hraðri
bílaumferð, hvað þá í hálkutíð. Flestir foreldrar myndu líklega banna
börnum sínum að hjóla þar.
- Hér á landi ríkir gríðarleg óþolinmæði og
taugaveiklun í umferðinni. Mikill fjöldi ökumanna sýnir hjólreiðafólki
afar litla tillitssemi. Það er ekki vitað hvort það breyttist við að fá
hjólarein í götustæði. Holdið er of veikt fyrir slíka tilraunastarfsemi.
- Mikill kostanður ef færa þarf alla akbrautina til
norðurs. Að auki má telja það nauðsynlegt að færa niðurföll og hafa þau
á milli hjólreiðabrautar og akbrautar.
- Flestir sem vanist hafa hjólreiðum í
nágrannalöndum hafa gefist upp á áframhaldandi hjólreiðum við
heimkomuna. Óljóst er hvort það breytist þar sem flestir óttast óvenju
slæma umferðarmenningu fremur en annað.
________________________________________________________________________
Viðbrögð við þessum tölvupósti bársut samdægurs.
|