Algjört Sinnuleysi

Þar sem ég bý í neðra Breiðholti hef ég orðið allskostar var við miklar framkvæmdir við Stekkjarbakka enda hafa þær staðið nú í ár. Í apríl 2003 var göngustígnum meðfram Reykjanesbraut skyndilega mokað í burtu vegna vinnu við mislægra gatnamóta fyrir bíla.
Nú hefur mér verið boðið upp á að hjóla í möl og drullu í heilt ár og nóg komið af því góða. Samkvæmt útboðsgögnum átti framkvæmdum við stígagerð að vera lokið 18. október 2003 með bundnu slitlagi, undirgöngum undir Stekkjarbakkann og göngubrú yfir Reykjanesbraut.
Að sögn verktakans sem dvelur á svæðinu verður ekki lokið við stígana fyrr en í júlí 2004. Þetta er algjörlega óviðunandi ástand enda er tímabilið frá maí fram í ágúst það tímabil sem flestir nota reiðhjólið og þegar svo mikilvæg samgönguæð er lokuð eða torfær þá augljóslega minnkar áhugi hjólreiðamanna á því að nota hjólið.

Yfirvöld hafa oft haldið því fram að stígagerð fyrir hjól standi ekki undir sér þar sem svo fáir nota hjólið til samgangna. Ég skora því nú á yfirvöld að standa þannig að næstu framkvæmdum (t.d. við Miklubraut-Kringlumýrarbraut) að hjólandi og gangandi vegfarendur fái algjöran forgang, hjáleiðir verði malbikaðar, vel merktar og eins stuttar og hægt er en aftur á móti yrðu hjáleiðir fyrir akandi vegfarendur þröngar, hættulegar, óupplýstar, ómerktar og ómalbikað drullusvað sem myndi tefja fyrir akandi umferð um 250% eins og er gert varðandi hjólandi og gangandi umferð nú um Stekkjabakka. Þá skulum við sjá hvort fólk fari ekki að nota hjólið til samgangna. Það er nefnilega þannig að ef engin væri sundlaugin, þá er engin sundmaðurinn. Ef engin er hjólavegurinn, þá engin er hjólreiðamaðurinn.

Myndir frá svæðinu teknar 7. apríl er að finna hér:
www.heimsnet.is/elvarorn/hjol/stekkjarbakki



Elvar Örn Reynisson
Jörfabakka 6
109 Reykjavík