Hjólamenn

 Hjólreiðafélag stofnað fimmtudaginn 11. nóvember 2004

Þetta nýja félag hefur fengið nafnið Hjólamenn og voru stofnfélagar þess 33 talsins. Félagið er starfrækt undir UMSK með aðsetur í Kópavogi. Töldu menn nauðsynlegt að auka fjölbreytnina í íslensku hjólalífi þannig að fleiri aðilar ynnu að framgangi þessarar skemmtilegu íþróttagreinar. Þannig vaka fleiri aðilar yfir íþróttinni, og  þegar eðlilegar niðursveiflur verða í starfsemi félags, ber hitt félagið fánann. Annars er hætt við að íþróttin staðni eða jafnvel sofni við og við. Þetta hefur eimitt gerst með ca. 10 ára millibili og er etv. ástæðan fyrir smæð þessarar greinar, þrátt fyrir að fyrsta félagið í hjólreiðum hafi verið stofnað 1897.  Var það annað íþóttafélagið sem var stofnað í landinu næst á eftir Skotfélagi Reykjavíkur. Þetta félag hét Hjólamannafélag Reykjavíkur og var stofnað af sendisveinum í bænum sem einskonar verkalýðsfélag. Það var reyndar lagt niður skömmu eftir aldamótin en Hjólreiðafélag Reykjavíkur sem við þekkjum stofnað nokkru seinna. Hjólreiðafélagið lá svo í dvala við og við á 20 öldinni og hjólreiðaíþróttin með því. Nú síðast var það endurreist veturinn 1997-1998 af nokkrum eldhugum.
Hjólreiðaíþróttin er skemmtileg blanda af liðakeppni og einstaklingskeppni, eins og allir sem fylgjast með erlendum keppnum í sjónvarpinu vita. Lance Armstrong færi ekki langt í Túrnum nema með hjálp sinna góðu liðsfélaga. Þetta hefur alveg skort hér hjá okkur, og er eins og okkur vanti ákveðna vídd í keppnirnar af þessum sökum. Fleiri félög munu með tímanum leiðrétta þetta og samkeppni milli þeirra vafalaust hækka “standardinn” í íslenskum hjólreiðum.
Erfitt er að byggja upp eðlilegan "strúktúr" í íþróttinni, svipaðan því sem tíðkast í öðrum greinum, með aðeins eitt félag. Íþróttasambandið leyfir okkur ekki að stofna Hjólreiðasamband fyrr en þrjú héraðsambönd sem hafa félög innan sinna vébanda krefjast þesss. Í framtíðinni gætu það orðið Íþróttabandalag Akureyrar, Íþróttabandalag Reykjavíkur og Ungmennasamband Kjalarnesþings. Hjólreiðanefnd ÍSÍ sem stjórnar íþróttinni í dag var pínulítið "skringileg" þar sem hún var yfir einu félagi og settu menn spurningamerki við nauðsyn hennar og vald. Nú þegar annað félag er orðið að veruleika er hún alveg eðlileg, og auðvitað var hún alltaf bráðnauðsynleg, þó ekki nema bara til að Íslendingar væru gjaldgengir í hvaða keppni sem er erlendis og vegna samskifta við erlend og innlend íþróttayfirvöld.

Markmið hins nýja félags er fyrst og fremst að efla íþróttina sem er ein sú vinsælasta í Evrópu og hefur notið sívaxandi þátttöku hérlendis síðustu árin. Þá ætlar félagið að halda sýnilegar keppnir og æfingar, auk þess sem stefnt er að því að gera íþróttina sýnilega í fjölmiðlum.

Ætlunin er að bjóða upp á ýmsar nýjungar í keppnishaldi, eins og að gera meira úr verðlaunaafhendingum, bjóða upp á nýjar keppnisleiðir og auka alla umgjörð kringum keppni. Eins mun félagið bjóða upp á reglulegar æfingar og inniæfingar á hjólum yfir vetrartíman auk tveggja útiæfinga í viku hverri. Daninn Mads Claussen hefur verið ráðinn aðalþjálfari félagsins. Unnið er að því að koma á legg heimasíða félagsins - hjolamenn.is –. Þar verður að finna ýmsa fróðleiksmola um hjólreiðaíþróttina auk upplýsinga um starf félagsins.

Hjólamenn vilja nota þetta tækifæri til að þakka öllum þeim aðilum sem hafa stutt þá fyrir veitta aðstoð og bjóða jafnframt nýja styrktaraðila velkomna til samstarfs.

Allar nánari upplýsingar má fá hjá Elvari Erni Reynissyni elvarorn@heimsnet.is Síma 5573863 og 6997412