|
Húsið
var teiknað sem skóli, af Guðjóni Samúelssyni,
húsameistara ríkisins. Húsið var
notað sem skóli frá 1928 þar til árið
1982 að nýtt skólahús var tekið
í notkun á Kópaskeri. Segja má
að húsið sjálft sé ekki síður
merkilegur menningarauður en þeir hlutir sem þar
eru innanhúss.
Söfnun muna má rekja til áranna upp úr
1950 er aðilar í sýslunni fóru að
safna munum sem þeir komu fyrir í geymslum. Árið
1959 fór Ragnar Ásgeirsson, þáverandi
ráðunautur Búnaðarfélags Íslands
yfirferð um bæi sýslunnar og safnaði
munum sem einnig fóru í geymslu. Á árunum
1960-80 safnaðist töluvert, en ekki tókst
að finna húsnæði sem hentaði fyrr
en gamla skólahúsið losnaði og ákveðið
var að koma þar fyrir Sýslubókasafni
N-Þing. og Byggðasafn N-Þing. Söfnin
fengu nafnið Bóka- og byggðasafn Norður
þingeyinga.
Hjónin Helgi Kristjánsson og Andréa Jónsdóttir
í Leirhöfn gáfu Norður-Þingeyjarsýslu
bókasafn sitt 1952, það var upphaf af Sýslubókasafni
Norður-Þing. Helgi var bókbindari og bæði
batt inn og gyllti bækur sínar og tímarit.
Hér er einnig safn ljósmynda með öllum
bæjum N-Þingeyjarsýslu auk margra mannamynda.
Árið 2002 var gerð breyting á rekstri
safnanna. Öxarfjarðarhreppur tók við rekstri
útlánadeildar. Héraðsnefnd Þingeyinga
rekur Byggðasafnið. Bókasafn Helga í
Leirhöfn er nú hluti af Byggðasafninu, en
útlánadeildin fékk nafnið Bókasafn
Öxarfjarða.
|
