Hluti af dökkri mynd
lýstur upp
 
 
Dökk mynd fengin úr stafrænni vél
 
Þessi mynd er öllu skárri en sú sem við skoðuðum áðan. Skuggar myndarinnar eru ekki eins djúpir og eru satt að segja aðeins öðru megin.  Hægri hluti myndarinnar er bara býsna fallegur með góða dýpt og breitt ljóssvið.  Það er því vinstri hluti þessarar tvískiptu myndar sem við þurfum að glíma við. Við veljum (með "Polygon lasso"-áhaldinu) vinstri helming myndarinnar og vinnum eingöngu með hann. Þetta er því mun meira fínstillingarspursmál en áður því ef við förum of gróft í hlutina verður of mikið misræmi milli myndhelminganna og útkoman eitthvað á þessa leið: 
 

Myndin er gervileg, skuggar flatir - og til að bæta gráu ofan á svart reyndi ég að bjarga henni með því að taka hana alla aðeins úr fókus.  En ástandið batnaði ekkert við það. Við þurfum að fara aðra leið.  Ef við kíkjum einu sinni enn á myndina er rauði liturinn kannski hennar helsta vandamál.
Roðinn deyfður 

Þessu er reddað á einfaldan hátt.  Við drögum úr litamagni þessa helmings myndarinnar (Hue and Saturation).  Pössum að ganga ekki of langt.  Við það er myndin þó nokkuð mikið betri og í raun nokkurn veginn í lagi.  En ég vil sjá betur þessa hillusamstæðu sem virðist vera að falla á hliðina. 
 
 
Hillan lýst upp 
 
Fyrst reyndi ég að lýsa upp vinstri helming myndarinnar en í ljós komu leiðilegir grænir flekkir í skugganum vinstra megin við hana (ekkert ósvipað misheppnuðu tilrauninni uppi).  Ég tók því til þess ráðs að velja eingöngu svæðið fram að vinstri enda hillusamstæðunnar og lýsa það.  Svæðið vinstra megin heldur því áfram að vera í skugga.  Ef vel er horft má sjá að skugginn er dýpri vinstra megin við samstæðuna.  Það gefur myndinni ákveðið vægi og hillusamstæðan stígur þar með eitt skref fram í átt til okkar.  En nú vil ég leggja áherslu á það hvernig hún hallar (í samanburði við vegginn).  Myndin var tekin eftir jarðskjálftann 17.júni og tilgangurinn var fyrst og fremst sá að sýna áhrif skjálftans á hillusamstæðuna og hvernig hann hnikaði henni til. 
 
 
Hillusamstæðan teiknuð fram 

Ég dreg því fram verkfæri sem kallast "Dodge" og lýsir upp þær myndeiningar sem bendillinn fer yfir (rétt eins og verið væri að pússa myndin).  Ég vel mér hæfilega stóran "skrúbb" (sjá: Windows/ Show Brushes) og fer varlega yfir útlínur hillusamstæðunnar. Einnig lýsi ég upp bækurnar í hillunni og skúffurnar niðri. Þyngd bókanna verður því meira áberandi sem áhrifaþáttur í pendúlsveiflu hillusamstæðunnar. Nú sitja bækurnar þyngra í hillunni sem hallar verulega samanborið við línu veggjarins. 
 
Litajafnvægið fundið
 
Að lokum ákvað ég að skoða litajafnvægi hillusamstæðunnar og veggjarins hægra megin við hana (Color Balance) og dró örlítið úr rauða litnum.  Ég gerði það með semingi því rauði liturinn var bara býsna fallegur þegar hann var orðinn nokkuð daufur.  En hér er engu að síður um að ræða raunsærri birtu.  Veggurinn er í raun mosagrænn á lit svo að þessi útkoma telst nákvæmust - hver svo sem smekkur manna er.